A kishte marrëveshje sekrete ndërmjet PDK-së dhe LDK-së në Prishtinë? – Havolli kjo është e vërteta!

Anëtari i LDK-së, Sokol Havolli ka mohuar se kanë pasur marrëveshje të sekrete me PDK-në për të mbështetur kandidatin e LDK-së për kryetar të Prishtinës Arban Abrashin, në balotazhin e 19 nëntorit.

Havolli, thotë se PDK-ja kishte vendosur pa koordinim me LDK-në për të mbështetur kandidatin e tyre për kryetar të kryeqytetit.

“Vendimi i tyre se kë do ta përkrahin, i takon atyre. Në zgjedhjet e kaluara e kanë mbështetur Shpend Ahmetin ndërsa në këto zgjedhje e përkrahen Arban Abrashin”, tha ai.

Sipas Havollit, e vetmja marrëveshje politike për të mbështetur Abrashin në balotazh ka qenë ajo me AAK-në.

 

“Marrëveshje mes PDK-së dhe LDK-së nuk ka pasur. E vetmja marrëveshje është ajo me AAK-në të cilën z. Abrashi e ka bërë me ish-kundërkandidatin e tij z. Vllahiu”, ka thënë Havolli.

Pas ankesës së LDK-së në PZAP, për parregullësi të mundshme gjatë procesit zgjedhor, kjo e fundit ka kërkuar rinumërim të votave në Prishtinë. /Gazeta Blic/