Smajl Latifi, Ibrahim Gashi dhe Jetullah Krasniqi ftohen nga Gjykata Speciale

Kryetari i Rahovecit, Smajl Latifi, ka bërë të ditur se ka pranuar të martën një ftesë për t’u paraqitur në Zyrën e Prokurorit të Specializuar me seli në Hagë.

Në një postim në Facebook, Latifi ka thënë se është i gatshëm të përballet me çdo sfidë.

Ish-pjesëtari i UÇK-së ka thënë se “asnjë forcë në botë nuk do të arrijë të përbaltë lufton tonë të drejtë çlirimtare, sepse mbi çdo skenar dashakeqës qëndron parimi i popujve për liri dhe të drejta kombëtare”.

“Sot kam pranuar një ftesë për t’u paraqitur në Zyrën e Prokurorit të Specializuar me seli në Hagë. Kam qenë i vetëdijshëm se rrugë tjetër për çlirimin e popullit shqiptar përveç luftës së armatosur nuk ka. Zaten, kjo është mënyra e vetme për të hequr robërinë popujt e pushtuar. I bindur në këtë pikëpamje, gjithnjë jam munduar që të bëj më të mirën për vendin tim, pa i cenuar vlerat morale të kombit shqiptar, të dëshmuara në luftë dhe në paqe. Jam thellësisht i bindur se asnjë forcë në botë nuk do të arrijë të përbalt luftën tonë të drejtë çlirimtare, sepse mbi çdo skenar dashakeqës qëndron parimi i popujve për liri dhe të drejta kombëtare”, ka shkruar ai në Facebook.

Organizata e Veteranëve të Luftës në Rahovec, përmes një njoftimi në Facebook, ka bërë të ditur se pos Smajl Latifit, ftesë nga Gjykata Speciale ka marrë edhe Milaim Latifi, ish-ushtar i UÇK-së dhe epror i TMK-së.

Sot ftesë nga Gjykata Speciale kanë marrë edhe Ibrahim Gashi e Jetullah Krasniqi.

Smajl Latifi (nga e majta), Ibrahim Gashi dhe Jetullah Krasniqi.